Luk 23:50-56 | YomNWM | STEP | Tala, mutu wumosi dizina diandi Zefu wuba wumosi mu batu baba kotanga mu lukutukunu lunneni lu Bayuda. Wuba mutu wumboti ayi wusonga.

Luke 23:50-56

Bazika Yesu

(Matayi 27.57-61 ; Malako 15.42-47 ; Yowani 19.38-42)

50 Tala, mutu wumosi dizina diandi Zefu wuba wumosi mu batu baba kotanga mu lukutukunu lunneni lu Bayuda. Wuba mutu wumboti ayi wusonga. 51 Niandi kasia bundana mu nzengolo yawu ko ayi mu mavanga mawu ko. Niandi wuba muisi divula di Alimate, divula di bayuda ayi niandi mamvandi wuba vingilanga Kipfumu ki Nzambi. 52 Wuyenda kuidi Pilatu, wunlomba nitu yi Yesu. 53 Bu kayi kulula va dikulusi, buna wuyizinga mu dilasola di lino ayi wutula yawu mu dibumbi disokulu mu ditadi dinneni. Kadi mutu kazikulu ko mu dibumbi beni. 54 Kiba lumbu ki khubumunu, tuamina lumbu ki saba ^{▼▼lumbu ki saba : Kuidi Bayuda lumbu ki saba kiawu lumbu kiawu kilumingu.}. 55 Baketo bobo balandakana Yesu tona ku Ngalili balandakana Zefu, bamona bibumbi ayi buevi batudila nitu yi Yesu. 56 Bosi bavutuka kuawu ayi bakubika mafuta ma tsudi yi kotoko ayi malasi. Bavunda kuawu mu lumbu ki saba boso bubela mina.